Dagrún Matthíasdóttir

Menningarbraut í Listagilið

2011-08-23T23:31:00.002Z

Menningarbrautin er komin í Listagilið! Ég f.h.Mjólkurbúðarinnar og norðurgils annarsvegar og Kristín Þóra f.h.Flóru og suðurgils hinsvegar réðumst í verkið í dag þegar stytti loksins upp:) Litaland gladdi okkur með málningu og við vonandi alla gesti listagilsins með gjörningi okkar. Mögulega verður aðgengi gangandi vegfarenda auðveldara yfir gilið með tilkomu menningarbrautarinnar.

"Hangandi skúlptúr í skóstærð" í Hofi Menningarhúsi Akureyrarbæjar

2011-08-23T18:51:00.004Z

Þá er það árlega samsýning Myndlistarfélagsins í rýminu Leyningi í Hofi menningarhúsi Akureyrarbæjar. Eins og á síðasta ári eru sýningarstjórarnir við Dagrún Matthíasdóttir, Brynhildur Kristinsdóttir og Laufey Jónsdóttir og er yfirskrift sýningarinnar hangandi skúlptúr í skóstærð. Þetta er fjölbreytt sýning á yfir 40 verkum í teygjanlegum útgáfum á skóstærðum og ekki sjálfgefið að fjallað sé endilega um skó í verkunum, heldur er frjáls túlkun og sköpunargleði í fyrirrúmi.

Fjöllótt í Mjólkurbúðinni Listagili

2011-05-06T19:27:00.009Z

Sýningin Fjöllótt opnar á morgun laugardaginn 7.maí í Mjólkurbúðinni á Akureyri. Þar sýni ég olíumálverk og vatnslitaskissur þar sem ég er að fást við fjöll sem myndefni. Viðfangsefnið eru litafletir fjalla sem koma undan snjónum svo myndefnið er oft örlítið dröfnótt, skjótt, flekkótt eða bara fjöllótt eins og titill sýningarinnar. Sýningin stendur til 22.maí og eru allir velkomnir að kíkja við í Mjólkurbúðinni. Opið lau-sun kl. 14-17.

Mjólkurbúðin Listagili

2011-05-02T11:51:00.003Z

Mjólkurbúðin í listagilinu, Kaupvangsstræti á Akureyri er nýtt sýningarrými sem er í minni umsjá. Mjólkurbúðin er staðsett undir Listasafni Akureyrar og opnaði formlega 12. mars með sýningu Mireyu Samper og Ástu Guðmundsdóttur, Í sjávarmáli. Heimasíða er í vinnslu en þangað til má alltaf fylgjast með á síðu Myndlistafélagsins www.mynd.blog.is en þar eru settar inn tilkynningar um sýningar á svæðinu og annað efni tengt myndlist.
Þeir myndlistamenn sem hafa áhuga á að sýna í Mjólkurbúðinni geta haft samband í dagrunm@snerpa.is.

Myndlistarfélagið í Hofi

2010-11-17T21:18:00.004Z

Kynning Myndlistarfélagsins stendur yfir í Hofi menningarhúsi Akureyrar. Á kynningunni eru verk rúmlega 60 myndlistamanna sem endurspegla fjölbreytileika myndlistar á Akureyri. Í dag eru félagsmenn orðnir um 90 talsins og fer þeim fjölgandi.
Öllum félögum var boðið að taka þátt í kynningunni og fengu myndlistamenn sendan bókbandspappír í stærðinni 20x20 cm til þess að vinna myndverk og hengja upp í rýminu Leyningi í Hofi. Húsið var opnað með pompi og prakt og þar á meðal þessi ágæta kynning sem stendur út nóvember. Gerður var bæklingur sem kynnir starfssemi félagsins og inniheldur líka stutt ágrip af myndlistarsögu Akureyrar.Félagsmenn Myndlistarfélagsins eru einnig allir upptaldir.
Mitt framlag á bókbandspappaspjaldið er portret af Meyju minni, Dagmeyju Björk.

Menningarhúsið HOF: http://www.menningarhus.is/

Grálist í Boxinu

2010-06-30T23:10:00.002Z

Grálist verður með samsýningu í sal Myndlistafélagsins, Boxinu, 3.-25. júlí. Þetta er samsýning 10 myndlistamanna í Grálist sem sýna allir ný verk á sýningunni. Opnunin er laugardaginn 3. júlí kl.14-17 og allir velkomnir.
Opið laugardaga og sunnudaga kl.14-17.
www.gralist.wordpress.com

Heimur hafsins

2010-06-30T23:01:00.003Z

Og ekkert slor! Nokkrar myndir eru til sýnis í fiskbúðinni Heimi hafsins. Þær hafa verið þar í vetur og veitt fisksalanum síkáta ómælda ánægju. Þar má sjá olíumálverk af harðfiski, gotu og fiskisúpu. Myndirnar verða áfram um óákveðinn tíma í Heimi hafsins og er ég mjög stolt yfir því að fá að sýna olíumálverk í fiskbúð. Hér má sjá úrvalið hjá fisksalanum á netinu: http://heimurhafsins.blog.is/blog/heimurhafsins/

Akureyrarvaka á DaLí

2009-08-24T20:18:00.002Z

Á Akureyrarvöku verður líflegt á DaLí Gallery og á vinnustofu DaLí. Það er opið gestum Akureyrarvöku kl. 14-17 og svo aftur um kvöldið frá kl.20-00. Dagskrá Akureyrarvöku á DaLí: Edda Þórey Kristfinnsdóttir og sýning hennar Vistaskipti. Síðustu forvöð og lokadagur sýningarinnar.
Steinn Kristjánsson verður með málverkasýningu í litla galleríinu KOM INN sem er litla rýmið á vinnustofu DaLí.
DaLíurnar, Dagrún og Lína pakka inn saumavél á súrrealíska vísu og verður heitt kakó í boði fyrir gesti gallerísins og sköpunarveggur þar sem má tjá sig á listrænan hátt.
Allir velkomnir.

Sex saman í Deiglunni á Listasumri

2009-07-28T16:15:00.001Z

Sex sýna" er samsýning sex myndlistamanna. Þrjár konur og þrír karlar; Ása Ólafsdóttir, Dagrún Matthíasdóttir, Sigurlín M. Grétarsdóttir, Margeir Dire Sigurðsson, Ólafur Sveinsson og Trausti Dagsson opna saman myndlistasýninguna "Sex saman" í Deiglunni á Akureyri, laugardaginn 1. ágúst kl. 15:00 í tengslum við Listasumar.
Verkin á sýningunni fjalla öll á einhvern hátt um kyn, jafnrétti, kynlæga túlkun eða kynjahlutverk. Listaverkin á sýningunni eru ljósmyndir, skúlptúr, myndband, málverk, innsetning og textaverk.
Sýningin stendur til 16. ágúst og eru allir velkomnir. Opið þriðjudaga til sunnudaga kl.13-17 í Deiglunni í kaupvangsstræti.

TRÉ í DaLí Gallery

2009-07-08T23:45:00.004Z

Sýningin TRÉ opnar í DaLí Gallery laugardaginn 11. júlí kl. 14-17. Á sýningunni TRÉ vinn ég í létt og ljóst rýmið sem DaLí Gallery er. Merking trés getur verið mjög fjölbreytt og táknmyndir þess margar og er sú tálsýn að peningar vaxi á trjánum mjög heillandi. Ég réðst í að gera mína útgáfu af peningatré með það í huga gera það án kostnaðar og að vinna það sem mest úr efni sem annars færi á haugana. Síðan uxu fleiri tré inn í rýmið. Efni sem unnið var úr: Dagblöð, pappi, lím, málning, umbúðarpappír, graphit litir, afklippur úr garðinum og vegakort. Sýningin stendur til 19. júlí og allir eru velkomnir.

SKURN á skúrþakinu

2009-06-21T20:31:00.001Z

Farfuglinn SKURN sem gerðist staðfugl á Öngulstöðum í fyrra á sýningunni Staðfugl/Farfugl og átti vetrardvöl í garðinum mínum þar á eftir, flaug með vorinu á skúrþakið hjá henni Öllu í næsta húsi. SKURN sómir sér vel þar og ætlar að dveljast þar áfram á þessu fallega gula húsi í Oddagötunni.

Gyðjan Freyja

2009-06-21T20:30:00.005Z

NÚTÍMA FREYJA -MÓÐIR-KONA-MEYJA er titill Freyjumyndarinnar í Landsbankanum á Ráðhústorgi hér á Akureyri í tengslum við samsýninguna FREYJUMYNDIR. Þetta er samsýning 27 listamanna þar sem hver fyrir sig túlkar gyðjuna Freyju í listaverki, finna gyðjunni stað og setja verkin upp í kringum sumarsólstöður. Nútíma Freyja er gyðjan sem boðar ást og frjósemi eins og til forna. Hún er nútímakonan sem tók þátt í búsáhaldabyltingunni og vill sjá meiri ást í samfélaginu, stjórnkerfinu og efnahagskerfi landsins, og umfram allt uppræta spillingu og sjá allt samfélagið dafna á ný. Freyjumyndir er hluti af viðburðaröðinni Vitið þér enn, eða hvað? Viðburðirnir eru á vegum Mardallar - félags um menningararf kvenna. Sýningarstjóri Freyjumynda er Guðrún Pálína Guðmundsdóttir og hefur hún notið aðstoðar Hrefnu Harðardóttur. Valgerður H. Bjarnadóttir er upphafsmaður viðburðaraðanna á vegum Mardallar og skipuleggjandi fjölþjóðlegrar ráðstefnu sumarið 2010 en þar með lýkur viðburðaröðinni. Sunna Valgerðardóttir sá um uppsetningu bæklings sem má nálgast hér: http://www.freyjumyndir.blog.is/users/9f/freyjumyndir/files/freyja_baeklingur.pdf

MATARLIST - Food Art in Startart

2009-04-02T09:10:00.008Z

Sýningin Matarlist opnar í Startart á Laugarvegi 12 b í Reykjavík 4. apríl kl.15. Þar sýni ég olíumálverk af mat sem hefur verið mér hugleikið myndefni upp á síðkastið. Málverkin eru máluð striga og mdf plötur, bæði 2008 og 2009. Verkin sem máluð voru á síðasta ári eru 90x90 cm og þau nýju sem eru rétt að þorna eru 40X40 cm. Ég hef yndi af því að elda og er alltaf mál að mála. Að vinna með mat í myndlist hefur verið mér hugleikið undanfarið og er ég hér að mála þann mat sem hefur dúkkað upp á borð hjá mér. Í raun er tíðarandin svolítið back to the basic eða sá að hefðbundinn íslenskur matur er mun oftar í matinn og ratar þess vegna í málverkin mín. Maturinn er bara svo fallegur, formin og litirnir heilla mig svo ekki sé minnst á bragðið!

Hér má sjá umfjöllun um sýninguna ásamt öðru á Landpóstinum: http://landpostur.is/news/daliur_blomstra_i_borginni/

Kappar og ofurhetjur í GalleríBoxi

2009-02-05T20:33:00.002Z

Kappar og ofurhetjur opna samsýningu í GalleríBOXI laugardaginn 7. febrúar kl.15. Þetta er samsýning félaga í Myndlistafélaginu og má sjá mjög fjölbreytt listaverk á einskonar móti félagsmanna. Þetta er líka fyrsta skipulagða samsýning Myndlistafélagsins, svo ég gekk stolt með slátrið mitt í BOXið til að sýna það með öllu okkar góða listafólki.
Sýningin stendur til 6. mars og er opinn alla laugardaga og sunnudaga milli kl. 13:00 og 15:00.

DaLí Vinnustofa opin 13.-14.desember

2008-12-04T16:49:00.002Z

Við dalíurnar ætlum að bjóða gestum og gangandi að kíkja við á vinnustofunni okkar um helgina 13.-14. desember, kl.14-17.

Þar má sjá verkin okkar og þiggja heitan sopa og kíkja í leiðinni á kreppuhilluna svokölluðu sem inniheldur myndlist á sanngjörnu verði.

Á DaLí vinnustofu starfa Dagrún og Lína og Inga Björk og Krumma.

Verið velkomin.

Ísbjarnarspor og senn flýgur SKURN

2008-09-07T12:16:00.010Z

Spor hvítabjarnarins var hægt að rekja frá sjó og upp gilið að Deiglunni á Akureyrarvöku. Sást það glögglega að hann er smekkbjörn því hann staldraði við bæði á Bautanum og hjá Friðriki Fimmta. Hann tók líka listalabbið við Ketilhús, Listasafnið, Deigluna, DaLí og Veggverk með viðkomu hjá Ferðafélagi Akureyrar og hjá Hofi þar sem hann naut gjörnings Önnu Richards. Þetta uppátæki bangsa að spígsora um á menningarvökunni fékk skemmtileg viðbrögð. Börn gerðu sér leik og röktu sporin og spunnu sín eigin ævintýri um hvað hann hafi verið að gera á leið sinni.

SKURN flýgur brátt heim og yfirgefur sveitasæluna á Öngulstöðum. Sýningunni Staðfugl Farfugl í Eyjafjarðarsveit lýkur 15. september.

GRÁLIST - engin smá list

2008-08-12T22:40:00.010Z

Grálist engin smá list - er yfirskrift samsýningar Grálistahópsins í Deiglunni 16. ágúst kl. 14.
14 meðlimir í Grálist sýna verk sem mælast öll meter eða meir, sem er sameiginlegi útgangspunkturinn í verkunum, sem er í raun mótvægi við sýningu hópsins Grálist með smálist í desember 2007. þá var unnið var út frá
því að ekkert verk væri stærra en 20 cm.

Mitt framlag er verkið HÆ HÓ JIBBÍ JEI. Ísbjörninn góði sem rak á fjörur um þjóðhátíð okkar Íslendinga og tröllreið fjölmiðlum landsins, tók yfir forsíður blaða og olli miklu fjaðrafoki í þjóðfélaginu. Átti að drepa hann? Máttu blaðaljósmyndarar mynda hann? Var hann bara grænmetisæta? Áttum við að bjóða honum að borða okkur? Átti að senda hann í dýragarð í Danmörku? Var þetta nýbúi? Bangsi var felldur og líka sá næsti, en engu að síður sáust spor um allt land og hvítabirnir sáust víða bæði í vöku og draumi þetta sumarið.

Samsýningin GRÁLIST engin smá list inniheldur verk eftir listamennina Stein Kristjánsson, Karen Dúu Kristjánsdóttir, Guðrúnu Vöku, Dögg Stefánsdóttur, Sveinbjörgu Ásgeirsdóttur, Ingu Björk Harðardóttur, Herthu Richardt, Margeir Dire Sigurðsson, Sigurlín M. Grétarsdóttur, Kristínu Guðmundsdóttur, Unni Óttarsdóttur, Steinunni Ástu Eiríksdóttur, Ásu Ólafsdóttur og Dagrúnu Matthíasdóttur

Gestaboð Búffu

2008-06-18T20:04:00.012Z

Gestaboð Búffu er málverkasýning til heiðurs Búffu búfræðings, sem er dulnefni systkinana í Alviðru á Sirrý stóru systur sem reynist sá mesti búfræðingur þegar nær er litið.
Gestaboð Búffu verður á Dýrafjarðardögum í sláturhúsinu við Odda á þingeyri helgina 4.-6 júlí. Gestaboð Búffu verður formlega opnað á föstudagskvöldinu kl.22 að lokinni setningu Dýrafjarðardaga og útgáfutónleikum í Þingeyrarkirkju. Sláturhúsið og Gestaboð Búffu verður opið laugardag og sunnudag kl. 14-18.
Eru allir gestir sem streyma til Þingeyrar, víkingar, íbúar, nágrannar, ættinjar, óætt-ingjar, staðfuglar, farfuglar, innlendir sem erlendir boðnir og velkomnir að líta við.

SKURN - VARP

2008-05-31T20:58:00.011Z

Staðfugl Farfugl samsýning í Eyjafirði var formlega opnuð í dag. Eyjafjarðarsveit skartar sínu fegursta með skemmtilegum fuglum og listaverkum eftir staðfugla og farfugla á öllum aldri.

Mitt framlag er skúlptúrinn SKURN sem stendur við Öngulstaði og þátttaka í verkinu VARP sem 11 manns í Grálist - Artgroup Grálist - unnu saman.

VARP: Við í Grálist tókum flugið inn Eyjafjörð og verptum saman á varplöndunum við Torfur, Smámunasafnið og á Rifkelsstöðum. Á Rifkelsstöðum var verpt í röngu landi fyrir mistök skipuleggjenda enda verður það hreinsað í burtu með fullri virðingu fyrir öllu varpi og landareignum.

SKURN: Ég er staðfugl sem víkkaði út sjóndeildarhringinn og gerðist farfugl. Sem farfugl er ég alltaf sami staðfuglinn því hvar sem ég lendi geri ég mér hreiður. Ég brýst út úr skelinni og held á ný mið en ber samt uppruna minn með mér hvert sem ég fer.

I am a stationary bird who did brighten my horizon and became a migratory bird. As a migratory bird I am still the same old stationary bird and make my nest wherever I lend.
I break out from my shell and explore new places and carry my background with me wherever I go.

Á döfinni

2008-05-09T18:22:00.003Z

Þá er skólinn búinn og alvara listalífsins tekin yfir að fullu. Myndlistaáfangarnir með kennaranemum og leikskólakennaranemum í HA héldu mér vel við efnið. Hlaupárshreingjörningurinn, gjörningurinn KUKL, Veggverk, DaLí Gallery, Grálist og vinnan í Gilfélaginu. Framundan í lok maí er samsýningin Staðfugl-Farfugl í eyjarfjarðarsveit. þar sýni ég skúlptúrinn SKURN og tek þátt í verkinu VARP með Grálist. Á Dýrafjarðardögum í júlí opna ég einkasýningu í gamla sláturhúsinu á Þingeyri til heiðurs Búffu búfræðings og í ágúst með samsýningahópnum Grálist í Deiglunni á Akureyri í boði Listasumars.
Set inn tilkynningar jafnóðum og myndir.

Hlaupárshreingjörningur

2008-04-07T22:10:00.009Z

Mitt framlag í Alheimsgjörningi í ár ber heitið Hlaupárshreingjörningur sem nánar er lýst:
,, something was growing in my kitchen... Sá hreingjörningur fólst í því að hreingjöra það sem óx í eldhúsinu mínu allan febrúarmánuð þetta árið og hlaupa með það út í garð á hlaupársdag og urða það....and now it is growing in my garden".
Á laugardagskvöldið 12. apríl verður 4 sýningin í Alheimsgjörningi Önnu Richardsdóttur til 10 ára í bílageymslu við Norðurorku á Rangárvöllum. Þar verða framkvæmdir hreingjörningar auk þess sem myndir og verk frá hreingjörningum annarra listamanna verða þar á samsýningu.
Til hamingju Anna og takk fyrir að treysta mér til hreingjörninga.

,,Lífið er saltfiskur"

2008-01-16T00:32:00.003Z

,,Lífið er saltfiskur”! Mér hefur alltaf þótt þetta snilldarfrasi. Allt frá því ég las bækurnar hans pabba um teiknimyndafígúruna Siggu Viggu og skildi hvorki frasann um saltfiskinn né pólitíska þráðinn í sögunum. En þótti drepfyndið að lífið gæti verið saltfiskur! Síðar á unglingsárunum vann ég í saltfiski inni á Langeyri við Álftafjörð og kynntist af eigin raun bæði saltfiskinum og striti vinnunnar í svuntu og stígvélum frá 66°norður.

Ekki nóg með að saltfiskur sé góður á bragðið og ég eigi góðar minningar um vinnu í saltfisk , þá er form sólþurrkaða saltfisksins myndrænt séð mjög flott. Frasinn ,,Lífið er saltfiskur” poppast alltaf upp öðru hvoru í umræðunni og finnst mér því tilvalið að nota form saltfisksins í myndsköpun svona rétt eftir neyslubrjálæði jólahátíðinnar á Veggverk og flytja það af einum vegg á annan yfir í DaLí Gallery og taka þar á móti skemmtilegu fólki 19. janúar kl.17.

Viðtal í 24stundum á bls.33 hér:
http://mbl.is/bladidnet/2008-01/2008-01-18.pdf

umfjallanir: http://veggverk.org/Site/Dagr%C3%BAn_Matth%C3%ADasd%C3%B3ttir.html#6
http://veggverk.org/Site/Dagr%C3%BAn_Matth%C3%ADasd%C3%B3ttir.html#5

Grálist með smálist

2007-11-06T22:05:00.000Z

Grálist með smálist er næsta samsýning Grálistar opnar laugardaginn 8. desember kl.14-17 í DaLí Gallery, Brekkugötu 9 á Akureyri. Þar mun Grálistahópurinn sýna smálistagjörning á myndbandi og smá listaverk sem öll eru undir 20x20 cm. Sýningin verður opin alla föstudaga og laugardaga kl.14-17 fram að jólum.

Vor - Súpur

2007-09-17T18:02:00.000Z

Súpurnar mínar hanga nú til sýnis á Vor Café Bistro á Laugarvegi 24 í Reykjavík. Sýningin opnaði formlega á fimmtudaginn var 13. september og það var gaman að hitta fjölskyldu, vini og aðra sýningargesti í hlýlegu andrúmsloftinu á Vor. Ég fer aftur í bæinn og tek þær niður þann 11. október. Matseðillin á Vor er léttur, góður og í ódýrari kantinum og ég mæli með góða kaffinu hjá þeim.

Dugnaður hjá Grálist

2007-08-23T18:56:00.000Z

Fólkið í GRÁLIST eru eins og gráir kettir út um allt! Steinunn Ásta opnaði sýningu í Bárubúð á Dalvík á fiskidögum sem stendur enn og Margeir Dire réðist í að graffa stóran vegg í eigu Björgúlfsfjölskyldunnar á einu húsi þeirra í Hverfisgötunni, spreyjaði listræna apaketti. Svo graffar hann á DaLí Gallery á Akureyrarvöku. Steinn vinnur á Veggverk, Steinn á stein á Akureyrarvöku og Steini verður með fiskisögur í KOM-INN á DaLí Gallery það sama kvöld. Sýning er í bígerð hjá Karen Dúu á næstunni og súpurnar mínar eru að fara í ferðalag og verða sýndar á Kaffi Vor á laugarveginum í Reykjavík. Heldnúbaraþað! Kraftur í GRÁLIST!

Kindarleg sveitarómantík snúrusýningu

2007-08-10T17:33:00.000Z

Handverkshátíðin að Hrafnagili var opnuð með formlegheitum og löngum ræðuhöldum í morgun og fengum við í Grálist hjá Víðáttu601 óvænta viðbót við snúrusýninguna góðu. Jú, við erum nokkuð á þjóðlegu nótunum í list okkar og fast uppvið nyrðsta snúrustaurinn jarma kindur í girðingu. Nokkuð kindarlegt en viðeigandi. Svo ekki sé minnst á kornakurinn austan megin við okkur, vinnuvélarnar vestan megin og auðvitað allt skemmtilega handverkið sunnan við okkur með kornið að leiðarljósi. Ég er í sveitó fílíng í dag enda í mjög svo fornu handverki, lopapeysunni góðu sem tengdamamma mömmu hennar Línu prjónaði, notaði og átti í áranna rás og færði svo mömmu Línu, ástkærri tengdadóttur sinni peysurýjuna fyrir um 17 árum síðan. Sem síðan Lína mín átti og gaf mér. Einhversstaðar heyrði ég spakmæli að góð vinkona væri eins og hlý lopapeysa. Kannski verður þetta svona framhaldssögupeysa sem gengur mann af manni eins og sögurnar forðum. Jæja, vinir mínir ég vona að þið hafið smitast af sveittapúkafílíngnum í mér og fundið sveitailminn í gegnum bloggið.

Sýningar hjá Grálist

2007-08-09T16:11:00.000Z

Þá er stóra samsýning Grálistahópsins að bresta á. Við erum að setja upp snúrusýninguna á vegum Víðáttu601 á Hrafnagilshátíðinni sem sett verður á morgun klukkan 10. Á vegum grálistar eru þessir 11 aðilar; Þorsteinn Gíslason, Steinn Kristjánsson, Sigurlín M. Grétarsdóttir, Linda Björk Óladóttir, Inga Björk Harðardóttir, Margeir Dire Sigurðsson, Unnur Ottósdóttir, Aðalbjörg Kristjánsdóttir, Steinunn Ásta Eiríksdóttir, Guðrún Vaka og Dagrún Matthíasdóttir. Við erum öll að fást við eitthvað þjóðlegt sem hengt er á gamaldags snúrur. Það er FRÁBÆRT hvað Grálistar eru duglegir þessa dagana því fleiri sýningar eru í gangi hjá hópnum. Kristín Guðmundsdóttir er að opna einkasýningu á Kaffi Von í Reykjavík næsta sunnudag, það er samsýning í Deiglunni á Akureyri hjá Ingu Björk Harðardóttur, Sveinbjörgu Ásgeirsdóttur, Unni Ottósdóttur, Aðalbjörgu Kristjánsdóttur og Charlottu Þorgils. Dagrún Matthíasdóttir (ég) er á Kaffi Karólínu og Steinunn Ásta Eiríksdóttir er með myndverk á Veggverk við Drottningarbrautina.
Þar sem gárungarnir í Grálistahópnum kalla mig grámömmu þá verð ég nú að lauma því að , að ég er einstaklega stolt móðir. Flott frammistaða og næst á dagskrá er að virkja bloggið okkar. Ég hlakka til.

Súpur á Café Karólínu

2007-08-04T00:09:00.000Z

Þá er komið að því! Sýningin mín á Kaffi Karólínu hefst á morgun 4. ágúst klukkan 14 og er yfirskriftin Súpur.

Mín fyrstu kynni af Kaffi Karólínu voru góðu súpurnar í hádeginu fyrsta veturinn minn hér í á Akureyri. Minningin um matarmiklar súpurnar sem aðalmáltíð dagsins varð til þess að mér fannst tilvalið að sýna súpur á minni fyrstu einkasýningu þar. Súpur er skemmtilegur og fjölbreyttur matatkúltúr sem fyrirfinnst allsstaðar í heiminum og má nánast gera súpu úr hverju sem er. Mín nálgun á súpur eru í þetta sinn í uppskriftarformi myndmáls og í texta, sem soðið er saman með myndbandi, olíu, akrýl og túss

Grálist

2007-07-01T22:35:00.000Z

Grálist - út um allt eins og gráir kettir. Já, hugmyndin um að skapa samsýningarhóp er fædd og eru þar frábært fólk útskrifað úr Myndlistaskólanum á Akureyri og er vant góðri samvinnu. Við sem þekkjum til litanna vitum svo vel að grái tónninn er samsuða allra lita litahringsins og endurspeglar þannig litaflóruna. Og það gerum við! Við erum vön að vinna saman að myndlist og markmiðið er að hópa sig saman í heild, í smærri hópum og sem einstaklingar sem félagar í Grálist og láta að okkur kveða í listalífi framtíðarinnar. Ungir, stoltir og hæfileikaríkir myndlistamenn sem vinna í hina ýmsu miðla myndlistarinnar. Til hamingju Grálist. Okkar fyrsta samsýning verður á vegum Víðáttu601 óstaðbundna galleríinu þeirra Steina og Dísu á Hrafnagili. Þar sameinar Grálist krafta sína á snúrulistsýningu í tengslum við handverkshátíðina á Hrafnagili.

,,19" í DaLí Gallery

2007-06-15T20:11:00.000Z

Jæja, þar kom að því. Nú ríð ég á vaðið í bleikum gír á afmælisdag kosningarrétts okkar kvenna. Ég er að fjalla um sjálfsmyndina með femínísku ívafi og máta nokkrar staðalímyndir. Ég get nú alveg látið það fljóta með að ég sé jafnréttissinni og vil að jafnrétti verði náð fyrir alla. Heyr, heyr :-) Sem sagt ég horfi á veröldina bleikum augum og skála í belikan búðing. Enda mikill heiður að halda upp á þennan dag. Meira segja ætla ég í bleikt. Kannski er hún Dagrún litla loksins að taka út bleika skeiðið sem litlar stúlkur upplifa gjarnan og fá meira að segja bleik augu eins og Áróra litla vinkona mín.

Tuomo og Nelli frá Finnlandi ætla að opna sama dag í KOM-INN sýningu sína ,,Take a Way" sem verður ábyggilega skemmtileg afhjúpun í litla rýminu KOM-INN. Það er viss áskorun að vinna inn í KOM-INN og kemur manni alltaf á óvart hvað er. Ég er handviss um að finnarnir mínir gera flotta hluti þar inni.

Ég hlakka til og verið velkomin í DaLí Gallery 19. júní og aðra daga.

Vetrarstemming, Bernskubrek og xB

2007-05-03T17:56:00.001Z

Það var víst ætlunin að skrifa eitthvað hér inn reglulega og veturinn er liðinn síðan síðast. En ég verð að viðurkenna að ég hef í nógu öðru að stússast. DaLí Gallery fær alla mína athygli, fjölskyldan og nútímafræðin í HA. Í þetta hefur veturinn farið auk þess skella upp einni og einni sýningu öðru hvoru. Í vetur sem leið hoppaði ég í flugi vestur á Ísafjörð og hélt málverkasýninguna ,,Vetrarstemming" á kaffihúsinu Langa Manga í desember og janúar. Og í mars tók ég þátt í samsýningunni ,,Bernskubrek" í Deiglunni í listagilinu hér á Akureyri. Núna er yfirstandandi samsýning á kosningaskrifstofu Framsóknarflokksins og eru þar verk eftir mig, Steina, Karen Dúu, Guðrúnu Vöku og Línu. Samt er ég nú ekki sannfærð um að þau eigi x-ið mitt. Jamm og jæja, það var ágætt að setja inn smá tilkynningu svona í prófalestrinum. Alltaf kát og hress Dagrún.

Útskriftarverkið í heild

2006-07-29T13:12:00.001Z

HVAÐ ER TRÉ ÞÉR? Ég fór á stúfana og tók viðtöl við fólk á aldrinum 6-80 ára og tók upp það sem þau höfðu að segja um merkingu trés í sínum huga og hvaða þýðingu tré hafi fyrir þeim. Hljóðverkið eru frásgnir þeirra. Ég málaði líka tvær samstæðar olíumyndir og færði texta úr upptökunum í málverk. Svo var innsetning þar sem ég kom tré fyrir á mitt gólf og varpaði skugga þess á vegginn og laufgaði skuggan með orðunum úr frásögnunum eða merkingu trés. Saman myndaði þetta heild þar sem áhorfandinn gat hlustað á frásagnirnar og virt fyrir sér tréð, lesið textan og skoðað málverkin í einni heild og upplifað merkingu trés í eigin huga og gerst þannig þátttakandi í verkinu.

KRUMMI-HVAÐ ER TRÉ ÞÉR

2006-07-20T19:21:00.001Z

Ég og Guðrún Vaka opnuðum myndlistasýningu um síðustu helgi (15/7) í Óðinshúsi á Eyrarbakka og köllum sýninguna KRUMMI-HVAÐ ER TRÉ ÞÉR. Við sameinuðum þarna útskriftaverkin okkar með örlítilli viðbót og erum hæstánægðar með móttökurnar. Salurinn er bara flottur og hráleiki hússins er einstaklega heillandi í sínum gamla stíl. Ég er með verkið HVAÐ ER TRÉ ÞÉR sem samanstendur af hljóðverki sem eru upptökur af frásögnum fólks um hvað tré standi fyrir og merki í þeirra huga, samstæðum olíumálverkum og akrylmálverkum af trjágreinum og laufum í vetrarbúningi. Guðrún Vaka er með verkið KRUMMI sem eru ljósmyndir af krumma með texta um minningar hennar í ljóðum sem er prentað á segldúk. Við fengum líka óvæntan gjörning á sýninguna um hamingjugyðjuna Fullu. Gjörninginn fluttu listafólkið Unnur og Reynir Katrínar. Það skapaðist rammíslensk stemming í Óðinshúsi, þar sem kraftar Krumma, vetrar, gróðurs, frásagna, minninga og tónaðra rímna gjörningsins sameinuðust fornu andrúmslofti hússins. Fyrir mér var þetta ógleymanleg stund og ég er full hamingju. Sýningin okkar er opin næstu tvær helgar eða til 30.júlí, laugardaga og sunnudaga kl.14-18.

Hér má sjá gagnrýni á mbl.is: http://www.mbl.is/mm/gagnasafn/grein.html?grein_id=1095003

Um mig

2006-07-05T08:36:00.001Z

Ég er Dagrún og bý á Akureyri með fjölskyldu minni. Maðurinn heitir Kristján Örn og dóttir okkar Dagmey Björk. Svo eru hinir fjölskyldumeðlimirnir persneskir kettir og ferskvatnsfiskar. Ég er myndlistakona útskrifuð úr Myndlistaskólanum á Akureyri og er nemi í Nútímafræði í Háskólanum á Akureyri. Ásamt vinkonu minni Línu rek ég DaLí Gallery í Brekkugötu 9 á Akureyri og þar erum við líka með vinnustofuna okkar. Þar bröllum við margt skemmtilegt saman og fáum til okkar frábæra gesti, myndlistamenn, listunnendur og allskonar skemmtilegt fólk.